పశ్చిమ బెంగాల్లో ఎన్నికల సంఘం (ECI) నిర్వహించిన స్పెషల్ ఇంటెన్సివ్ రివిజన్ (SIR) తర్వాత విడుదల చేసిన ముసాయిదా ఓటర్ జాబితాలో లక్షలాది పేర్లు తొలగించడ
పశ్చిమ బెంగాల్లో ఎన్నికల సంఘం (ECI) నిర్వహించిన స్పెషల్ ఇంటెన్సివ్ రివిజన్ (SIR) తర్వాత విడుదల చేసిన ముసాయిదా ఓటర్ జాబితాలో లక్షలాది పేర్లు తొలగించడంపై తీవ్ర విమర్శలు వెల్లువెత్తుతున్నాయి. ఈ క్రమంలో హూగ్లీ జిల్లా దాంకుని మున్సిపాలిటీ 18వ వార్డు టీఎంసీ కౌన్సిలర్ సూర్య డే (Surya Dey) డ్రమాటిక్ నిరసనకు దిగారు. డ్రాఫ్ట్ జాబితాలో తన పేరు ‘మరణించినవారు’ జాబితాలో చేర్చబడిందని తెలుసుకున్న ఆయన, డిసెంబర్ 16, 2025న కోల్కతా సమీపంలోని కలిపూర్ శ్మశానవాటికలోకి నడిచి వెళ్లి, తన అంత్యక్రియలు నిర్వహించాలంటూ అధికారులను డిమాండ్ చేశారు.సూర్య డే అనుచరులతో కలిసి శ్మశానంలో కూర్చొని, “నేను స్వయంగా నడిచి వచ్చాను, శ్వాసిస్తున్నాను, మాట్లాడుతున్నాను. కానీ ఎన్నికల సంఘం నన్ను చంపేసింది. అధికారులు వచ్చి నా అంత్యక్రియలు చేయాలి” అంటూ నిరసన తెలిపారు. ఒక ప్రజాప్రతినిధిగా తనకే ఇలాంటి పరిస్థితి ఎదురైతే, సామాన్య ప్రజల గతి ఏమిటని ఆయన ప్రశ్నించారు. SIR సమయంలో తాను స్వయంగా ఫారం నింపి, అవసరమైన పత్రాలు స్థానిక ఎన్యుమరేటర్కు అందజేశానని, అయినా తన పేరు తొలగించడం ముమ్మాటికీ పొరపాటు కాదని, ఇది ‘ఎలక్టోరల్ వండలిజం’ అని ఆరోపించారు.
ఈ ఘటన సోషల్ మీడియాలో వేగంగా వైరల్ కాగా, టీఎంసీ నాయకులు దీనిని ఎన్నికల సంఘం యొక్క ‘కుట్ర’గా అభివర్ణించారు. రాష్ట్రవ్యాప్తంగా SIR తర్వాత విడుదలైన డ్రాఫ్ట్ ఓటర్ జాబితాలో 58.20 లక్షలకు పైగా పేర్లు (మరణించినవారు, వలస వెళ్లినవారు, డూప్లికేట్లు) తొలగించబడ్డాయి. ఈ సవరణ డిసెంబర్ 4 నుంచి 11 వరకు జరిగింది. టీఎంసీ ఇది నిజమైన ఓటర్లను డిస్ఫ్రాంచైజ్ చేసే ప్రయత్నమని, బీజేపీతో కుమ్మక్కై జరుగుతోందని ఆరోపిస్తోంది. మరోవైపు బీజేపీ ఈ సవరణను సమర్థిస్తూ, అక్రమ వలసదారులను తొలగించడమే లక్ష్యమని చెబుతోంది.
ఎన్నికల సంఘం డ్రాఫ్ట్ జాబితాను విడుదల చేసిన తర్వాత క్లెయిమ్స్ అండ్ ఆబ్జెక్షన్స్ కోసం విండో ఓపెన్ చేసింది. ఈ ఘటన 2026 అసెంబ్లీ ఎన్నికల నేపథ్యంలో రాజకీయ ఉద్రిక్తతలను మరింత పెంచింది.