సంక్రాంతి సందర్భంగా హైదరాబాద్-విజయవాడ హైవేపై టోల్ ఫ్రీ ప్రయాణం ?

తెలంగాణ ప్రభుత్వం 2026 సంక్రాంతి సందర్భంగా హైదరాబాద్-విజయవాడ జాతీయ రహదారిపై 3-4 రోజుల పాటు టోల్ ఛార్జీలను రద్దు చేయాలని యోచిస్తున్నది. ఈ మేరకు కేంద్రానికి ప్రతిపాదన పంపింది. ఇది ఇంకా అధికారికంగా ఆమోదం పొందలేదు. దీనికి కేంద్ర ప్రభుత్వం మరియు NHAI అనుమతి అవసరం.

సంక్రాంతి పండుగ సమయంలో హైదరాబాద్-విజయవాడ హైవేపై టోల్ గేట్ల వద్ద ట్రాఫిక్ జామ్‌లను తగ్గించడానికి, వాహనాలు ఎక్కువ సమయం వేచి ఉండకుండా చేయడానికి తెలంగాణ ప్రభుత్వం ఈ ప్రతిపాదన చేసింది. ప్రత్యేకించి పంతంగి, కోర్లపాడు, చిల్లకల్లు టోల్ ప్లాజాల వద్ద రద్దీ ఎక్కువగా ఉంటుంది. రోడ్డు నిర్మాణ పనులు, డైవర్షన్ల కారణంగా ఇప్పటికే ఆలస్యాలు జరుగుతున్నాయి.

పండుగ సమయంలో కుటుంబాలు, పిల్లలు, వృద్ధులతో ప్రయాణించే వారు ట్రాఫిక్ జామ్ వలన అనేక ఇబ్బందులు ఎదుర్కొంటారు. టోల్ ఫ్రీ చేయడం వల్ల ట్రాఫిక్ సాఫీగా సాగుతుందని భావిస్తున్నారు.

ఈ మేరకు డిసెంబర్ 31 (మంగళవారం) సచివాలయంలో ఉన్నత స్థాయి సమావేశం జరగనుంది. ఇందులో ఉమ్మడి నల్గొండ జిల్లా కలెక్టర్లు, పోలీసులు, R&B అధికారులు పాల్గొంటారు.